Pinilit kong palalimin at lumalim nga
Pinilit kong hanguin at hindi ko nagawa
Hinayaan ko't nagningas na bigla
Tinangka kong takasan, nguni't 'di nakawala
Tinabunan ko gamit ang lahat ng lakas
Subalit mas nag-ibayo ang kanyang pag-aklas
At ang tanikalang gumapos sa pagkapantas
Ay tila laway ng bulkan na nag-alpas
Pinabaha ko sa pag-asang ito'y maaanod
Pinalango'y hanggang sa kamay ay mapagod
Nanginginig ang mata habang pinanunuod
Lamunin nawa siya at tuluyang malunod
At sa pagpikit ko pagkagat ng dilim
Tila isang bangungot sa aki'y gumising
Kumikinang sa dilim ang pangil n'yat ngipin
At ako'y kasama sa pinagbaunang lalim